النكتة Vs الأزمة
في شأن النكتة اليوم في السودان وانتشارها كالنار في الهشيم
بعد بحث قليل عن مفهوم النكتة وتاثيرها على الفرد/الراي العام لمجموعه
معينة في مكان معين، التعامل معها كظاهره فريده في المجتمعات المختلفه
محليه/عالميه ،قديما/حديثا،علاقتها بالازمات الاجتماعيه/الاقتصاديه/السياسيه،سرعة
انتشارها وتداولها ،اتناول النكتة اليوم في الشارع السوداني مع اضافة بعض المقتتطفات
من كتاب هشام جابر*(النكتة السياسية عند العرب بين السخرية
البريئة والحرب النفسية) وهو عباره عن دراسة لحال النكتة في الوسط العربي .علنا نعي الحالة
التي نعايشها الان.
البداية مع الاصل:
نَكْت
الفعل نكت أي ضرب الارض بقضيب من حديد،
فأثر فيها ،وحطم قشرتها.
نكَّتأتى بطرفة في كلامه اضحك
الاخرين
النكتة نوع من انواع الادب الشعبي تحكي قصة/موقف قصير بغرض التاثير
على المتلقي وجعله يضحك.
متى تظهر النكتة/العبارة الساخره؟
عندما يحفل المجتمع بالنقائض والمفارقات،وتتعقد
شؤون الحياة ،تنشأ ظواهر تبدووكانها في غير مكانها متنافرة مشوهة وبالتالي مثيرة للضحك.
الواقع ان الضحك/لمرح/الفكاهة/النكتة/الكوميديا
كلها وصف لمعان من الطبيعة البشرية الني تحاول الهرب من الجدية والصرامة والعبوس والحزن. وسيلة طرح خارجه عن المالوف،بها نقد/راي/نصح بقالب فكاهي محبب دون قيود
"من الملاحظ ان اشد الناس فقرا ،وعوزا،وبؤسا،يكاد يكون أكثرهم نكتة وظرفا.أحمد
امين"
لا علم لي عن بداية انتشار النكته/الفكاهة في السودان تاريخيا ،لكن في
تسعينات القرن الماضي بدات ظاهره المجموعات الفنية الساخره التي تعمل على نشر فن
النكتة/المنولوج وسط المجتمع اما عن طريق المشاركة في الفاعليات الاجتماعيه
الجماهيريه او عبر وسائل الاعلام المختلفه من تلفزيون وراديو،واشرطة الكاست .لاقت
هذه الظاهره رواج كبير جدا واعجاب من قبل المجتمع الي ان خفت نجمها مؤخرا مع وجود
القليل من الاعمال التي تظهر من فتره للاخرى.
لا اعتقد اننا شعب يصنع النكته بكل سهوله حتى التفاعل معها وردات
الفعل متفاوته،لذلك نلاحظ تباين اتجاه موجة النكات التي انتشرت في الفتره الاخيره
مع الازمة الاقتصادية التي تضرب البلاد والعباد .
سنلاحظ ان النكات التي خرجت
هذه الفتره هي من واقع الاحداث المثاره باختلافاتها وارتباطاتها،حدوثها جميعا في
نفس الفتره،منها الاجتماعيه والاقتصاديه المعيشيه وحتى السياسيه،في شكل نصوص و رسوم
كاركتيريه.
النكتة التي يتداولها الناس هي اكثر صراحه واكثر طرافة واعمق تاثير من
مثيلاتها التي تقال على المسرح او تكتب في حكاية او مقال بسبب إنعدام المسؤولية التي
تترتب عليها اضافة الى سعةانتشارها وسرعة التداول،في هذا
المقال التركيز على النكتة السياسية/الاقتصاديه وحضورها اليوم.
ان النكات تمثل ثورة على السلطة،فهي المتنفس عن مكنونات الشعب ،في كثير
من الاحيان لا يعرف مصدرها الاساسي شانها شان الشائعة،منها ما يكون من مخيلة شعبية
بريئة ومنها ما يكون مختلقة من جهة تعي الوضع السياسي وتعي تاثير السخرية السياسية
على معنويات الناس وهيبة الحاكم.ومنها ما هو جزء من التكتيك السياسي للمعارضه للنظام.
النكتة السياسية شكوى وضعت في قالب طريف
،مبعثها الكبت السياسي والحرمان من حق التعبير عن الرأي العام،يسمح لها بالوصول الى
السلطة الحاكمة بسرعة قياسية،رغم التاثير يجب عدم المبالغه بفاعليته،كسلاح في مواجهة
الظلم
ومن جانب اخر تتخذ الانظمة السياسية الدكتاتورية
من النكته سلاح ترويج لفكرة،او طعن حالة تهدد استقرارها السياسي.
فالكثير من النكت تشيع وتنشر من دون القدرة
على فرز مقاصدها.(علنا نجتهد في فهم المقصد المرجو!).
"يقول سجموند فرويد عن النكتة السياسية" تتيح لنا استغلال ظاهره مضحكة في خصمنا لا نقوى على كشفها جادين متعمدين
لما يعترض سبيلنا من عقبات".
"يقول عباس محمود العقاد في النكتة السياسيه:
ضرب من المران على التفكير السريع وشحذ للفهم وتقويم له على المنطق السديد،ولنكتة واحده
يفهمها السامع حق الفهم،خير من مائة درس في المنطق يقرؤه ويعيده وهو لا يحسن القياس
ولا يفقه الدليل."
للنكتة السياسية الناقده اثر تصحيحي نوعا
ما،فهو يوحد الراي العام اتجاه قضية معينه،يلفت الحاكم الى اخطأ في الممارسات،لا يجرؤ
على ذكرها له المستشارون.
(هل نجح عدد من الحكماء والمسؤولين في توظيف
ظرف بعدالظرفاء،لامتصاص غضب الجماهير والتنفيس من خلال التنكيت والسخرية من الواقع
.)هذا سؤال لنا جميعا..
الشكل الأخر المُهم والمؤثر في نظري فن الكاركتير ، يسعى الكاركاتير الى معايشة العامه والخاصة على حد سواء فتصل الصورة/الفكرة
بكل ابعادها وصدقيتها الى الهدف المرجو توعيته او تعريته لقضايا الساعه، الهدف من الكاركتير تجسيد مأساة بصورة وتعليق موجزة او حتى دون تعليق
.
وبلغ فن الرسم الكاركتيري مع تطور التكنولوجيا
حدا جعله في مصاف وسائل الاكثر اقناعا وطرافة في الحرب النفسية.والدعاية السياسية.بقدر
ما تكون الصورة اكثر تعبيرا والتعليق اكثر اختصارا بقدر ما يكون الكاركتير ناجحا،والصورة
المعبرة التي تنشر دون تعليق كثيرا ما تصيب من الهدف مقتلا.
*توصلت مؤسسة غالوب الامريكية(من اهم مؤسسات
استطلاع الراي في العالم) في استطلاع اجرته1995
الى ان عدد مطالعي الكاريكاتور بالنسبة الى سائر مواد التحرير في الصحف قد ازداد بنسبة
4الى 1.وهذا الامر يدل على مدى نجاح هذا الفن في ارضاء ذوق الجماهير وتامين فسحة من
الراحة والحرية.
ملحق مجموعة من النكات التي صاحبت الأحداث خلال هذه الفتره بالاضافة
الى رسومات كاركاتيريه:
"جونا ضيوف..
بدو الونسة بي الدولار..والغلاء..
ووضع البلد..
والسودان غني..
واسي الونسة في مرحلة ارتريا والجيش..
الحمد لله فضل ليهم قاسم بدرى ويتخارجو"
******
"تتذكرو لمن بتخربو نشيد العلم بي(نشتري العيشة باغلى ثمن)"
******
"رباطابي قال الرغيفة والطعمية الكتوف اتلاحقت ما عارفين
البيحشوها في رفيقتها ياتها"
*******
" يااااااا حااااج انا طالب يد بنتك
ــــ مؤهلاتك شنو يا إبني?!
شغال في فرن
الفففففف مبروك يا ابني"
*******
"واحدة قالت قبيييل ركبت مع بتاع ركشه
لاقى صاحبو في الاشارة كورك ليهو وين يا
اصلي شنو ياااخ مسترغف كدا ؟؟؟؟
صاحبو قاليهو والله ما مسترغف لكن الجري
بس يا عمك ...
سالتو قلت ليهو مسترغف يعني شنو ؟؟؟
قال لي يعني بقى غالي زي الرغيف ورافع القزاز
مالكم مسترغفيييين"
********
"سبحان الله كل شي في البلد دي زاد
حتى التردد حق القنوات السودانيه من
27500
بقي 30000"
********
"سمعتو بالمثل الجديد
بنت فران ولا دكتورة اسنان
سجمنا والعيش هجمنا "
******
"مسطول قالوا ليه: رايك شنو في النزول
المفاجئ للدولار من46 لي 30 ؟
قاليهم والله ما عارف لكن زمان جدي كان
عيان و فجأة بقي كويس
حبوبه قالت لي دي فجة الموت"
*******
"حبوبة راكبة الموصلات جات واحدة هنديه ركبت
جنبها
حبوبة اتلفتت علي الهنديه لقت ليك الشعر
بتاعة طويل طول مبالغة
حبوبة قالت ليها ؛ ما شاء الله تبارك الله
شعرك طويل يابنتي انتي من وين
الهنديه قالت ليها ؛ انا من الهند
حبوبة قالت ليها ؛ هنديه وبتتكلمي عربي
كمان ماشاالله شعرك ده عملتي فيه شنوو بقي طويل كده
الهندية قالت ليها ؛ نحن عندنا في الهند
شجرة مشهورة اسمها جوز الهند وبتطلع زيت جوز الهند
انتو في السودان ما عندكم شجرة زيها
حبوبة قالت ليها ؛ ايوة عندنا شجرة كبيرة
و اسمها المؤتمر الوطني وبتطلع زيت الشعب
شايفة شعري ده ممعط كيف كلو من زيت الشجرة
دي "
********
"أزمة طاحنة في هولندا بسبب ندرة المجرمين
و تهديد العاملين في السجون بخسارة وظائفهم.
اغرب حاجه فى التقرير دا انه هولندا إستوردت
مساجين من النرويج حتى لا يفقد العاملين بالسجون وظائفهم !!!
الكفار ديل جنوا ولا شنو ؟؟ يا كافي البلاء
لا مال عام لا فساد اداري؟؟"
********
"في قصة من قصص العرب
قالو واحد اشتري خروف وخاف من الحرامية
يسرقو قام ربط جرس في رقبة الخروف وربط الخروف في حمارو الله يكرمكم وبقي ماشي والخروف
وراهو لمو فيهو حرامية سرقو الخروف وربطو الجرس في ضنب الحمار وصاحبنا مطمئن سامع صوت
الجرس وماشي واحد من الحرامية وقفو وسئلو قاليهو ياعم
مالك رابط جرس في ضنب الحمار ردة عليهو قال انو رابط الجرس في الخروف قال ليهو وينو
الخروف صاحبنا اتلفت مالقي الخروف الحرامي قال ليهو انا شفتة واحد شايل خروف ودخل بيهو ع المزرعة ديك مسكني
حمارك دة وامشي حصلو
وفعلا مشي يفتش لا لقي الخروف ولا لقي الحمار
لما رجع بقي ماشي وحزين فقد الخروف والحمار لحدي
م وصل ناس جمب مكان فيهو موية سئلو مالك مهموم قام حكي ليهم قصتو قالو ليهو عندنا كيس دهب وقع في الموية دي لو غطستة وطلعتو بنقسمو معاك
بالنص
صاحبنا م صدق ملص هدومو وتلب في الموية
اخد غطستو يفتش وفي النهاية قنع وطلع لا لقي دهب ولا لما طلع لقي هدومو
اهااااااا
ديل نحن مع الانقاذ
#اول 10 سنين ماشين وسامعين صوت الجرس وخروفنا
مسرووق من بدري
#تاني 10 سنين بنفتش للخروف لا لمينا في
الخروف ولا لمينا في الحمار
#واخيرا 10 سنين ملصنا هدومنا نفتش للدهب
لا لمينا في الدهب ولا لمينا في هدومنا وبقينا مملصين"
********
"*حجاوي سوداني بلغة العصر*
بعض التفسيرات العصرية للحجاوي السودانية
القديمة :-
*1- خروفي كبر فوق البيت لا بعتو إتكسيت
لا ضبحتو إتعشيت ؟*
الإجابة :- البترول في السودان .
*2- حبوبتي من شدتة ولضتة شايله جدي في
رقبتها ؟*
الإجابة :- الشعب السوداني.. ومدى تحمله
للحكومة .
*3- دخل القش وما قال كش ؟*
الإجابة :- اسرائيل في اجواء السودان .
*4- قاعدة في ديوانها وتاكل في مصرانها
؟*
الإجابة :- العمالة الاجنبية في السودان
.
*5- عندي طبيق ملان نبيق ؟*
الإجابة :- مرتبات الموظفين في السودان
.
*6- قطع البحر بلا عضم ضهر .*
الإجابة :- قبول اولاد المسؤلين في الجامعات
والوظائف الحكومية
*7- مية ما يملن صينية ؟*
الإجابة :- الرغيف .
*8- كان شالو ما بتشال كان خلو سكن الديار
؟*
الإجابة :- عمك بشة .
*10- شطة ومطة والشافها كلو نط ؟*
الاجابة :- الميزانية الحالية في السودان
."
********
عمر البشير سأل مسطول قال ليهو أحسن انا
ولا عبود، المسطول قال ليهو احسن انت طبعا يا ريس، البشير قال ليهو ليه، المسطول قال
ليهو عبود كان بيخاف من الانجليز، البشير اتكيف شديد، قال ليهو، طيب احسن انا ولا النميري،
المسطول قال ليهو انت طبعا يا ريس نميري كان بيخاف من الامريكان، البشير انبسط، قال
ليهو، عظيم طيب منو الاحسن انا ولا عمر بن الخطاب، المسطول قال ليهو انت طبعا يا ريس،
البشير قال ليهو أها دي كييبببف؟ المسطول قال ليهو عمر بن الخطاب كان بخاف من الله!!"
********
"يحكى أن البشير قال لعبد الرحمن الصادق المهدي
:
ما تجي نمسكك رئاسه البلد دي ......
عبد الرحمن قال ليهو كدي يا ريس خليني أشاور
الإمام
مشي لي أبوه الصادق المهدي، وقال ليه يابا
: البشير قال داير يمسكني رئاسه البلد دي رأيك شنو ؟
الصادق قال ليه : اوعك ح تبقي عليك حكايه
جنازة الأبيض. ....
عبد الرحمن قال لي أبوه كدي احكي لي حكايه
جنازة الأبيض دي!!!!
الصادق قال ليه : في الأبيض تلب حرامي في
بيت عزابه،،،، مسكوهو ودقوهو لامن مات .....
العزابه رأسهم ضرب وقعدو جنب الجثمان لي
قريب الصباح ....
فجأه واحد من العزابه قال ليهم جيبو لي
كفن ....وبدأ يغسل في الجثمان وكفنو وانتظرو لحدد الشمس أشرقت وجاب عنقريب وقال للجماعة
شيلو الجنازة وراحكم المقابر .....
وجاء شاقي بيهم سوق الأبيض ،،، جماعه السوق
شبكوهم صلو علي النبي وواحد من ناس السوق يمسك رجل العنقريب وواحد من العزابه يتملص
لامن وصلو المقابر الناس بقت ما عارفه الجثمان تبع منو ؟
ولا الميت منو ؟
ولا الحاصل شنو اصلا؟
فدحين يا عبد الرحمن يا ولدي اعتذر ليه
بي دبلوماسية كده وخليه يدفن جنازتو"
***********************
_______________________________________________________________
*هشام جابر انتسب الى المدرسة الحربية في لبنان تخرج منها ضابطا عام 1964،ليلتحق بالمدرسة العسكرية التطبيقيه في فرنسا،بعدها عمل ضابطا في العديد من وحدات الجيش اللبناني،ثم العمل في رئاسة قسم الاعلام في الجيش اللبناني،في العام 1979 اخذ دورة مكثفة في الحرب النفسية في قاعدة فورتبراغ العسكرية في كارولاينا الشمالية امريكا،ثم الدراسات العليا في كلية القيادة والاركان وفي ميدان الاعلام والاتصال الجماهيري بولاية كانساس امريكا،تولى الكثير من المناصب أخرها رئيس مركز الشرق الاوسط للدراسات والعلاقات العامه .
تعليقات
إرسال تعليق